Hiiŕokõnõ, haĺkõnõ

Hiiŕokõnõ, haĺkõnõ,
mustakõnõ, mu hobõnõ!
Üü-ks olĺ pümme ja pümet,
taivas olĺ vaiki ja vahane,
ärä viidi ese hopõn,
velĺo vars varastõdi.
Kedä-ks aia’ otsimahe,
keda käske kaemahe?
Aie-ks ma oŕa otsimahe,
kaŕalatsõ kaemahe.
Saa õs oŕast otsijata,
kar´alatsest kaejata.
Lätsi-ks ma esi otsimahe,
kaldu ma esi kaemahe,
võti-ks ma suitsõ’ sulu päältä,
päitse’ pääliku läve päält,
lätsi-ks ma tuu mäe pääle,
keere-ks ma tuu kingo pääle–
mäest joosi’ ollõuja’,
kingo’ keedi humalita.
Sääl ma päitsit raputelli,
sääl ma suitsit sulbahuti.
Hiiro tulĺ mano, hirnõlli,
musta tulĺ mano muhaskõlli.
Sis ma kündü küsümähe,
nõssi hiirolt nõudõmahe:
kos sa ollit, ku ma otsõ,
kos sa käket, ku ma käve,
sinä tantset külä tatrikah,
videlide külä viĺoh.
Tuud must mulle ütel,
hiiro-ks mulle sis kõneli:
Õga-ks ma tantse tatrikah,
videle es külä viĺoh –
olli-ks ma jumala sajaga,
pühä Maar´a vaka peräh,
naksi säält kodo tulõmahe,
koh olĺ mägi, sääl mänge,
koh olĺ kallas, sääl kargsi.
Sääl sis kinkti kinktüisi,
pilti pikki linkitta,
panti sääl lehele linik,
anti sääl kabjule kapuda,
panti hanna pääle hamõh.
Naksi säält kodo tulõmahe,
vasta tulli vaenelatsi,
hamõh olĺ säläh käüssildä,
rüüd säläh proimilda,
toolõ-ks ma anni nuu ande,
toolõ-ks ma kinke kinktüse’.
Hiirokõnõ, haĺkõnõ,
mustakõnõ, mu hobõnõ.

RKM, Mgn. II 2426 g < Setomaa, Suure-Nedsaja k. (Järvesuu v.) - Eesti Raadio, Jaan Sarv < Jekaterina Lummo, 58 a, eeslaulja; Anna Uibo, 58 a, killõ (1973). Laul punktinoodi lehel