Kadrilaul

Kadrikõsõ’, kudrikõsõ’, kadrigoo, kadrigoo!
Kost kadri’ siiä’ tulli’?
Kadri’ tulli’ kavvõndõsta,
läbi suu libõda,
läbi pikä pilliruu,
läbi kalõ kastõhaina,
pilliruugu silmä’ pisti,
kastõhaina kaala lõigas.
Kadri-ks omma’ toolta maalta,
koh kurõ’ kulda söövä’,
hani’ hal´ast hõbõhõta.
Tulli läbi pikä mõtsa,
tulli korgõ kuusõmõtsa,
kuusõnõgla’ kurku/o lätsi,
kadajanõgla’ kaala tulli,
pähnälehe’ pääle joosi.
Oh näid vaesit kadrilatsi/e,
kadrikõsõ, kudrikõsõ!
Kuulõ’, peenü perenaane,
pääle peenü peremeessi,
lasku-ui olla ussõ takah,
lasku-ui saista saina takah!
Tere, ahi, ams-suu,
tuhkhaud, tulimulk!
Kadrikõsõ’, kudrikõsõ’!
Anna-ks liha lipsokõnõ,
anna’ villo veid´okõsõ,
anna’ rasva raasakõsõ,
kuulõ’, peenü perenaane!

EKRK, Fon 23 (5) < Setomaa, Haudjasaare k – Udo Kolk < Agrepina (Agripina) Pihlaste (1892–1968), Anna Arumets, killõ, ja koor (1961).
Laul punktinoodi lehel