Urbõpäävä laul. Meremäe

Üles tulli urbõpäivä,
urbõpäivä, tsõõ-tsõõ, urbõpäivä, tsõõ-tsõõ!
Mis meil viga laulu laulda’:
puulehe’ punõtasõ’,
mõtsaladva’ veretäse’.
Kuio-ks kuio’, kelto,
keväjätse tuulõga,
sügüsetse ilmaga!

ERA, Pl 71 A3 < Meremäe – August Pulst, Herbert Tampere Riigi Ringhäälingu stuudios < Ir´o Liivik ja koor 1937.
Laul punktinoodi lehel

Sõnu võib täiendada Ello Kirsi kirjapaneku põhjal:
Urbõpäävä vaia inne päävä nõsõngut neelähütä urbõkõnõ tsälkmäldä alla, sõss püsüt suvõl vii pääl. Urbõ-ossakõsõga min’ lauta ja lüü’ lehmäle, et pasanõ-vasik, aagu-i mu lehma kiini, sõss ei nakka kari suvõl kiinih käümä. Urbõpäävä tsõõtadi aia pääl ja lauldi:

Tsõõ, tsõõ, urbõpäivä, tsõõ-tsõõ, kallist aigu.
Urbõkõnõ, tsõõ-tsõõ, pääväkene tsõõ-tsõõ,
oo armas, tsõõ-tsõõ, aokõnõ tsõõ-tsõõ!
Mille meile, tsõõ-tsõõ, kavva tulli, tsõõ-tsõõ,
kavva tulli tsõõ-tsõõ, kavva olli, tsõõ-tsõõ?
Ar´a mi uinu, tsõõ-tsõõ, uutõnna, tsõõ-tsõõ,
ar´a jo’ vaiu, tsõõ-tsõõ, vahtinna, tsõõ-tsõõ.
Künnü mi sinolt, tsõõ-tsõõ, küsümähe, tsõõ-tsõõ:
Koh sa urbõ, tsõõ-tsõõ, üüdä olli’, tsõõ-tsõõ,
üüdä olli’, tsõõ-tsõõ, päivä tulli’, tsõõ-tsõõ?
Minga sinnu, tsõõ-tsõõ, söödetegi, tsõõ tsõõ,
söödetegi, tsõõ-tsõõ, joodõtegi, tsõõ-tsõõ?
Anti kas kuivi, tsõõ-tsõõ, kusõluida, tsõõ-tsõõ,
anti vai suuri, tsõõ-tsõõ, silgipäidä, tsõõ-tsõõ?
Midäs tõiõ, tsõõ-tsõõ, tullõnani, tsõõ-tsõõ,
midäs saiõ, tsõõ-tsõõ, saiõnani, tsõõ-tsõõ?
Tõiõ kas lauta, tsõõ-tsõõ, lambida, tsõõ-tsõõ,
tõiõ kas sulgu, tsõõ-tsõõ, suuri tsiku, tsõõ-tsõõ?
Anna no teno, tsõõ-tsõõ, Jumalalõ, tsõõ-tsõõ!
Tõi’ küll meil põhku, tsõõ-tsõõ, põrssida, tsõõ-tsõõ,
tõiõ lauta, tsõõ-tsõõ, lambida, tsõõ-tsõõ.

ERA II 194, 411/3 (17) < Vilo v, Vilo k < Ungavitsa k - Ello Kirss < Ann Pääsläne, s. 1863. a. (1938).